غيرك أتعس..

أنا ولد.. ماني كبير او صغير مره .. مراهق يبحث عن أمان عن مأوى عن صديق عن حياة كريمة عن حقوقه..
لكن ما حصل لي أي شي من هذولي بسبب الظلم بأسم العدل!
أعيش مع أب وأم ما يرضيهم شي وما لهم إلا رأيهم
أعيش أكبر اخواني وخواتي ولا لي من هالكبر نصيب!
أبوي وأمي دايم اذا كان فيه موضوع بتكلم لهم فيه أكون أنا الغلطان أنا بمثابة اليهودي مغتصب أطفال المسلمين وبياخذون حقهم منه!
ضربوني وعذبوني وذلوني وكسرو الموجود واللي موب موجود على ظهري ووجهي وكل شي بجسمي!
كان أبوي يضرب لأنه مشتهي يضرب ويفرغ الغضب اللي فيه علي أنا!
لي أخ أصغر مني بثلاث سنوات ياخذ حقوقي ويسمحون له يسوي اللي يبي علي !
عندهم مبدأ المساوات بدون العدل يعني اذا بيعطوني ريال- مع انها مستحيلة- يعطون الباقين مثلي بالضبط الصغير والكبير العاقل والعكس!
(أبوي كان يقولي : لا تتسلف) وهو الآن معيشنا على الدَّين !!
دين مهول ما أدري وشلون بيرده
أنا أبي أبسط حقوقي من أهلي أنا حالياً أبغا أتزوج لأني عارف لو ما تزوجت بسوي شي ما يرضي ربي
لكن جهلهم ودَينهم وتعاملهم يخليني ما أقدر أطلب شي
أنا أشوف كل اللي بعمري عندهم سيارات بس انا ما عندي ولا طلبت!
انا اشوف ناس يتزوجون بعمري لكن انا ما تزوجت ولا طلبت!
انا اشوف ناس تسافر وتتمشى لكن ما سافرت ولا طلبت!
سوّيت خطة مالية الهدف منها توفير الفلوس اللي تنصرف مننا استغربت من كمية التبذير والديون اللي عند أبوي وخطتي كانت بتوفر من 15%الى35% لكن أبوي لو طبق خطتي بيكون على حسب تقكيره نزل لمستواي وهذا شي ما يبيه فرفض خطتي!
أنا ما أقدر أشتري سيارة .. أتزوج.. أسافر .. أستمتع .. بسبب أمي وأبوي واخواني !
أسمع الناس تقول أبوي وداني أبوي سوا لي أبوي عطاني أبوب يحبني أبوي يهتم فيني
لكن أنا أبوي يظلمني أبوي يضربني أبوي يظلمني أبوي ياخذ حقي أبوي يظلمني أبوي ياخذ فلوسي بدون اذني أو رضاي!
أسمع الناس تتكلم عن رحمة الأم عن أي رحمة تتكلمون؟قصدكم بطش الأم؟ قصدكم ظلم الأم؟ قصدكم تفتين الأم؟!
أبوي وظيفته على قده ما فيها زود راتب ما يكفيه لحاله وجاي يشاركه معنا !
دين مليوني!
ظلم !
قهر!
ميل لطرف دون الآخر!

والله لو تجيني فلوس تكفيني ما جلست عندهم دقيقة!
ما يعتبروني شي !
طردوني من البيت!
كنت أجي أفضفض لهم أكلمهم واذا أبعدت عنهم أسمعهم يضحكون علي!
مستعد أتركهم بس أحد يحبني أحد يعوضني عن اللي فقدته أحد ينتبه لي أحد يعطيني وما ياخذ مني!
غيرهم يتمنى الولد والبنت وهم أشبه ما يكونون كفروا بهالنعمة اللي عندهم!

وبسبب رغبتي الشديدة في الزواج أحس اني بادي أميل للجنس المماثل !

أخيراً أنا ما أملك اني أقول كل شي لأن( في فمي ماء)
لو تقدر تساعدني لو بكلمة ساعدني لعل ربك يفرج عنك بيوم تحتاج فرجه

لا حول ولا قوة إلا بالله حسبي الله

10 Comments

متاكد ان هذولا اهلك المهم ياقلبي لاتزعل نفسك ياحياتي واحمدربك انك رجال والله انا مثلك كبيرة البيت وضرب واهانات ودايم اقول ليتني ولد والله معاد يشوفون وجهي لكن انت رجال وسيد الرجال وماشاء الله تبارك الله ماشاء الله ماشاء الله ربي يحفظك من العين والحسد كلامك كلام ناس مثقفين ووعين ومتعلمين حرام بالله ولا الدكتورفي الجامعه ماشاء الله عليك واهلك فعلا ظالمين وماقدروالنعمه الله ينصرك عليهم نصرعزيزمقتدر الله ينتقم منهم والله مايستاهلون ظفرك الصغير لكن الله يفرجهاعليك ويرزقك من حيث لاتحتسب ويفكك منهم ببنت الحلال الي تسعدك وتسترك يارب وتعوضك وتخلف لك اولاد وبنات وامانه عليك لاتفكر بالكلمه الى انت قولتها بادي اميل للجنس المماثل انت رجال رجال رجال وهذي ماهي علوم الرجال تزوج حتى لو مسيار بنت تقدرظروفك الين ماتتحسن ظروفك ويجيك مال وخلها تشتغل على بال ماانت تحصل وظيفه

انت ليه معتمد على اهلك وتنتظر منهم شي
انت لسه صغير ؟؟؟!
اذا ايوه اصبر لحد ماتكبر
اذا لاء خلص لاتهتم مشكلتك تافهه مع احترامي لك
انت مصعبها لانك رابط الحل في اهلك
ذكرتني بقصه
فيل كان صغير يربط من رجله بحبل يمنعه من الحركه
ولما كبر وصار بحجم الجبل لما تنربط رجله بنفس الحبل يوقف عن الحركه وهو يقدر يقطع الحبل بدون اي مجهود
يعني انت تم تدريبك على الدوران حول البيت
وتفكيرك مقيد فيهم

استهدي بالله
ونفذ وحده وحده
لاتنتظر من اهلك شيء الا اللهم انهم يدعون لك بتوفيق
انتسب في دراسه بجامعه بعيده عن اهلك او اشتغل بعيد عنهم علشان تقدر تقوم على رجليك اما وجودك معهم مقيدك
١- استقل بعمل يجيب لك راتب مايقل عن ٦٠٠٠او ٥٠٠٠
ابحث عن سكن خاص فيك عزاب سنوي ب١٢ الف وفيه اقل
واعتقد عندك مواصلات اذا ماعندك اشتري مستعمل يمشي حالك لحد ماتفرج
وحاول تخبي باقي راتبك
تجمع لك مهر واتقدم للبنت اللي تعجبك وبالزياره الاولى روح لحالك واذا سالوا اهل البنت وين ابوك قول ان شاء الله بالزياره الجايه وانا جاي اشوف انتم تقبلون فيني واذا قبلوا فيك
خذ ابوك واذا قالك ماعنده فلوس يزوجك ووو قول
انك بتتسلفها وتقدم المهر استعجل بتقديم المهر لايطمع ابوك فيه
وابعد عنك الافكار الغلط بان تجرب الميل للجنس الثاني لانهم كلهم امراض وبتاخذ غضب الله وماراح تتوفق طول حياتك حتى لو تزوجت الله لايقدر يجيك ولد يضرك وكفايه فكره العذاب بلاخره
واقترح انك تتزوج موظفه علشان تتفق معها وتفهمها انه لمصلحتكم تتعاون معك بانك انتا تاخذ لك قرض وتشتري شقه وتسكن فيها احسن من الايجار لانه خساره على الفاضي
وهيا راتبها كله لها ولاتقصر معها لو احتاجت وانت معك شيء

الله يوفقك

الله يسهل امرك
اول شي لولا اللهم ثم ابويك لمى كتبت عنه ماكتبت
اتق الله في نفسك وصٌرف على ابويك لا بو الفلوس
انفق من طيب نفس وحتسب الاجر
ابوك صرف عليك (كد عمره لك ) ولا خلاك تحتاج احد
بصغرك اكاد احلف انه يحتاج مبلغ مالي عند صغرك
ويبديك على نفسه اللبسك احسن الثياب واللباس
ركبك احسن السيارات بمقدوره
الان تقول عنه كذا اتق الله في نفسك

إذا موظف وتقدر تنقل انقل لأي مدينه صغيره تكون نفسك فيها
أما إنك بديت تميل للجنس بالمثل
استغفر ربك انت إنسان سوي لاتحول نفسك لشاذ مكروه من الله وخلقه

أكثر من الاستغفار
ومادام يضحكون على سوالفك
التزم الصمت

لوكان فيه حكمه أفضل من الصمت
ولا التزمت الصمت والصمت حكمه

صادقة الاخت عايشة انشغل عن البيت بالدراسة وحاول تحط حسلك فيه عشان تتخرج وتلاقي وظيفة تعطيك راتب عالي ، وانت تدرس اشتغل شفتات الحين المطاعم مليانه وراتبها يجي ٤٠٠٠ بالشهر يعني بالسنة تحصل ٤٨٠٠٠ حاول م تصرفه وخبييه ولا يدرون اهلك انك تشتغل عشان م يطمعون فيه وانقص لهم منه ١٠٠٠ كان ودك انت سهل الحياة وراح تتسهل لك اقنع عقلك الباطني انك رجال وراح تلاقي البنت الصالحة لا تتزوج وانت مكسور !!
ولا تبين لاحد انك مكسور
اذا تزوجت البنت راح تحضنك وتنسيك همومك
ولا تعق اهلك ابعذ عنهم وبر فيهم لا تقابلهم واجد ولا تناقشهم واجد اقعذ بغرفتك ذاكر او اشتغل

يااخي كيف حالك؟ اتمنى انك بخير
هدي من نفسك وروق أعصابك الدنيا ماتسوى ..انا انصحك تتوظف شوقلك شغل وجمع فلوس انا عندي اخ كان يشتغل وهو يدرس بالجامعه ومو غصب عنه بس رغبه منه يقول بدل مااضيع وقتي مع شباب مامنهم فايده وطول وقتي بالشارع اروح اشتغل .اهلك يمكن غلطوا وانت حسااس بزياده شوف لو كل واحد بيقارن نفسه باخوانه حس انه مظلوم لان اخي واختي اللي اكبر مني انضريوا وشافوا تريية زمااااان لكن انا كان اخف شوي بس لو تشوف اخواني واخواتي اللي من بعدي دلللللع ومدارس اهليه وجوالات وايبادات وكل شيء ..الأهل احيانا يحملوا الاخ الكبير فوق طاااقته ويعلقوا فيه امل انه رجل ويعتمد على نفسه ومايحتاج ندلعه ويدلعون الصغار والله تصير احيانا وانا اعرف ام عذبت بنتها الكبيره وضرب وحرمان وتحمل مسؤوليه من يوم هي صغيره ولما كبرت وجولها اخوات واخوان صارت الام تدلع الصغاار ..عموما الله يهدي والدينك ووالدينا وجميع الاباء والأمهات ويعينهم على تربية اولادهم بالطريقة الصحيحه ..
بالنسبه انك صرت تميل للجنس المماثل انتبه لان الشذوذ زي المرض المزمن ويهز عرش الرحمن يعني الزنا اهون من علاقه شاذه ورغم انها كلها من الكبااااائر فانتبه ع نفسك عشان لاتندم بعدين
تقدر تسجل بجمعية الزواج وتطلب منهم يزوجوك ودورلك شغل وخذلك سيارره اقساط.بس يبقى السكن والمصروف مشكله .. ترى الزواج مسؤوووليه ..ممكن تكلم احد من اقاربك خالك او عمك او خالتك او عمتك جدك جدتك فضفض لاحد تحس اهلك يتاثروا بكلامه وخليهم يكلموا اهلك او يساعدوك والله يسهلك ويوفقك انت في عز شبابك بدل ماتهدم نفسك ابنيها وروح اشتغل وادرس ودور على حلول منطقية لاتحط نفسك في زاوية وتستنى الفرج يجيك لا انت مسؤول عن نفسك وعن سعادتها دور حل يخليك تكون في المكان اللي تبغاه ..

لاحول ولاقوة الا بالله

دائما اردد واقول عمرالظروف ماتصنع فاشلين بل تصنع ابطال يعتمدون على نفسهم ويثبتوا للغير نحن عكس ماتظنون وعكس ماتنظروا الينا انتقل اذا كنت قادر لانك لم تذكرسنك ووظيفتك ولكن لاتنجرف مع التيار بل اثبت على مبادئك واثبت للغيرعكس مايظنون وحقق اهدافك الوظيفه والزواج دعهم يفتخروا ويندموا على كل افعالهم المؤلمه لك وكل ظنونهم السيئه

حبيت أرد على بعض التعليقات للتوضيح
أنا ما خلصت الثانوية وباقي عليها
واللي يقول لبسني أحسن الثياب والسيارات اللي يقدر عليها بغيت أقولك ان ما عندي الا ثوبين طول السنه وسروال وفنيلة ومتقطعات من كثر الاستعمال والوقت
واللي يقول (انت ومالك لأبيك) هل هي قرآن؟ هل هي تحل ضربي دون اخواني؟ هل تُجيز الظلم علي؟ هل تُجيز أخذ كل اللي كنت أجمعه بلمح البصر عشان كماليات لهم؟ واذا قلت ضرب تراي أعنيها وابعطيكم مثال صار لي ، جاني مره أبوي ومعه عسيب نخله وبدا يضرب فيني بكل مكان تكسرت العصا وباقي يضرب وجاب ثانيه وثالثه لين ما شبع وهالضرب كان قدام أصدقائي واخواني !! أنا ومالي لأبي؟

وشكراً للي قال كلام حلو والله أسعدتوني

خلك على خبري مثل ريحة العود ، اذا احترق بـ النار يزداد طيبه

أضف رد

لن يتم نشر عنوان بريدك الإلكتروني.

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>